Greenery: a cor de 2017 segundo Pantone

Cada mes de decembro, Pantone, a autoridade mundial da coloración anuncia cal será a cor tendencia que durante o próximo ano dominará as coleccións de moda, deseño, arquitectura e decoración. Tras o reinado compartido en 2016 do rosa cuarzo e o azul serenidade, dous tons suaves que casaban á perfección entre si, o elixido para ser o protagonista do 2017 é o Greenery, un ton de verde que evoca os primeiros días da primavera.

Trátase dunha tonalidade refrescante e revitalizante obtida da mestura entre o verde e o amarelo, que fai referencia á paz que se atopa na diversidade da natureza. É fácilmente identificable, e desde Pantone defíneno como algo máis que unha cor: un estado de ánimo, unha actitude, un símbolo de novos comezos.

https://www.youtube.com/watch?v=8zC75u81VKg

Tal e como declararon os representantes de Pantone, foi elixida por ser a cor da esperanza, da nosa conexión coa natureza. Cada primavera empezamos un novo ciclo e nacen novos brotes da terra. O Greenery fala de palabras “re”: rexenera, refresca, revitaliza, renova.

A xa tradición de anunciar a cor do ano comezou no 2000 cando, tras repasar as tendencias en sectores como o cine, a moda, o deporte, as viaxes ou ata as condicións socioeconómicas do momento, Pantone decide elixir o azul cerúleo como o ton que mellor representaría os intereses e preocupacións globais para os doce meses posteriores.

Desde entón, o Instituto da Cor foi marcando unha cor por cada tempada, a excepción do pasado ano, cando o rosa cuarzo e o azul serenidade compartiron posto. Marsala, esmeralda, orquídea radiante, turquesa, mimosa ou mandarina tango son só algunhas das cores que tras a predicción de Pantone, cumpríronse relixiosamente no mundo da moda e o deseño. Preparados para renderse ante os encantos do Greenery?

Se che parece unha cor difícil de combinar, non te preocupes porque Pantone xa fixo os deberes por nós e ensínanos tamén con que tons encaixa mellor, como o rosa cuarzo e o azul serenidade, as cores tendencia de 2016; o coral calipso ou o azul orión.

Aínda que nas tendas aínda predomina o momento rebaixas, moi pronto a nova colección de primavera gañará terreo, e virá cargada de cores vivas como o refrescante verde Greenery. Mentres tanto, deixámosche unha selección de looks de street style para que vaias collendo recortes porque, o Greenery arrasará en 2017!