Benvido outono, benvido cambio de armario
Aínda que cada vez contamos con máis pezas de roupa versátiles e atemporais que utilizamos durante todo o ano, ao chegar a fin do mes de setembro, o armario pídenos un cambio. Retiramos as bermudas, bañadores e sandalias e damos a benvida aos abrigos, xerseis e bufandas. Mentres que o bo tempo non nos diga adeus definitivamente, parece que nos resistimos a asumir a entrada do outono nas nosas vidas, pero máis vale previr que curar se non queremos que o primeiro temporal da tempada nos pille co bikini posto.
Hoxe no blog de As Cancelas repasamos os mellores trucos para optimizar e facer máis levadío o cambio de tempada no armario. Aínda que nos dea moita preguiza, é moi necesario porque senón nunca saberemos a roupa que temos e sempre vestiremos igual.
A primera das tarefas a realizar, e que facilitará moito o resto delas, é sacar toda a roupa do armario e aproveitar para limpar ben o po. Ter todas as prendas á vista axudarache a facer balance do teu vestiario ao completo, incluíndo todo o que xa nin lembrabas que tiñas. Se non tes ambientador, é o momento de facerte cun para evitar a aparición de trazas e malos cheiros na roupa. E se xa utilizas un, aproveita para substituílo por un novo.
Con todas as prendas xa fóra do armario, o seguinte paso e revisalas para retirar todas aquelas que xa non che acaian, non te gusten ou simplemente non puxeras nestes dous últimos anos. Iso tamén inclúe ese pantalón tan bonito dun talle menos que compraches confiando en que estiraría ou aquela camisa tan de moda coa que nunca te acabaches de ver. Sabemos que ás veces custa desprenderse de certas pezas, pero hai que pensar que poden ter unha vida mellor xunto a outras persoas. Doa ou regala todo aquilo que se atope en bo estado e recicla o que non serve para reutilizar. Sabías que cada vez máis tendas implementan iniciativas de reciclaxe para pechar o ciclo da produción téxtil?
Antes de gardar o que non volverás poñer ata o vindeiro ano, repasa botóns, costuras e asegúrate de que non haxa manchas nin danos. O consello é gardar a roupa limpa e pranchada, para evitar que se humedeza, mareleza ou se estrague, nun lugar seco, con pouca luz solar e cunha temperatura agradable. É recomendable poñer etiquetas ou rótulos nas caixas ou bolsas para identificar o contido de cada unha, por se de súpeto necesitas algo puntual. Para o calzado que teñas almacenado en caixas podes pegar unha foto de cada par no lateral para ter todos os pares perfectamente identificados.
Unha vez almacenada a roupa que non nos volveremos poñer ata o vindeiro verán, procederemos a organizar a do outono, que é a que permanece connosco os 365 días do ano, como as camisetas básicas, os jeans, a cazadora vaqueira, o trench ou a cazadora de coiro. O ideal é ordear por categorías, colocando todas as pezas do mesmo tipo xuntas e en escala de cores. Desta forma terás unha idea clara das pezas coas que contas cada tempada.
Á hora de escoller que é o que vai colgado ou dobrado, hai que fixarse se as teas se engurran moito ou non, aínda que é recomendable que camisas, chaquetas, vestidos, saias ou pantalóns se coloquen en perchas, para evitar pasar o ferro ás pezas dúas veces. As camisetas, suadoiros ou xerseis poden ir dobrados, pero evita facer pilas enormes porque así será máis difícil controlar todo o que tes. As pezas máis delicadas, como as que levan apliques, brocados ou abelorios deben colgarse do revés e de forma individual, e as pezas de pel en fundas de tea, nunca en bolsas de plástico, para que a pel transpire.
Un dos aspectos máis importantes a ter en conta antes de poñerte mans á obra co cambio de armario é buscar un momento de tranquilidade e afrontalo como algo divertido que nos vai reportar numerosas vantaxes. Se o fas ás presas e con desgana só conseguirás que o momento xere estrés. Aínda que inicialmente seguro que se che ocorren mil plans mellores antes de dedicar unha tarde a actualizar o teu armario para a nova estación, asegurámosche que despois de facelo, sentiraste moito mellor.