Reciclar a túa roupa ten recompensa
O cambio de estación está cada vez máis próximo. O 21 de xuño diremos adeus á primavera para dar a benvida ao tan esperado verán. Fóra abrigos, fóra medias, fóra bufandas, fóra luvas e fóra botas; dentro traxe de baño, dentro lentes de sol, dentro sandalias, dentro bermudas e dentro vestidos. Soa idílico, verdade? O que xa non soa tan ben é o temido cambio de armario, ese momento no que nos vemos obrigados a gardar no trasteiro o vestiario máis invernal para deixar espazo aos looks máis estivais, e que adoita ir acompañado dunha limpeza.
Aquel vestido tan xeitoso que compraches nas rebaixas pero que nunca atopas o momento de poñer, os pantalóns que xa non che serven, esa camiseta que causou furor hai dúas tempadas pero que agora prefires nin ver… Son só algúns exemplos da longa lista de pezas que cada ano ocupan sitio no teu armario e que non usas.
Con motivo da conmemoración do Día Mundial do Medio Ambiente o día 5 de xuño, desde As Cancelas queremos concienciar sobre a importancia da reciclaxe, da recuperación de residuos e do coidado do medio ambiente, o que tamén inclúe a reciclaxe de roupa e demais téxtiles.
Desde o blog de As Cancelas aproveitamos a celebración deste día para recompilar as iniciativas de reciclaxe de tecidos que algunhas marcas de moda foron incorporando ás súas políticas medioambientais, pechando así un ciclo que comeza coa produción de pezas e que termina coa recuperación das mesmas cando finaliza a súa vida útil, para evitar que cada ano toneladas de tecidos e pezas terminen nos vertedoiros, xa que ata un 95% deles poderían utilizarse de novo.
En H&M dispoñen durante todo o ano dun colector para recoller roupa desgastada, rota ou pasada de moda de calquera marca, ata téxtil de fogar, como toallas ou cortinas. Por cada bolsa de roupa que entregues, recibirás un cupón de 5€ de desconto para a túa próxima compra de máis de 30€.
Calzedonia tamén se suma á reciclaxe para darlle unha nova vida á túa roupa de baño. Por cada peza de roupa de baño de muller, home e nenos depositada no colector habilitado na tenda, recibirás un vale desconto de ata 5€ (en función da peza que entregues) para a compra doutro traxe de baño. Só ata o 30 de xuño!
En Intimissimi, a marca de lencería do mesmo grupo empresarial que Calzedonia, tamén levan a cabo unha promoción similar para a recollida de roupa interior con entrega de vales desconto. Neste momento non a teñen activa, pero podes gardar a lencería que xa non necesites para reciclala na próxima campaña.
Se ti tamén te sumas á reciclaxe de tecidos, a recompensa que recibirás é dobre: por unha banda contribúes ao coidado e preservación do medio ambiente, e doutra banda, poderás conseguir descontos para renovar o teu fondo de armario
Únete a reciclaxe!