Apúntaste á moda sostible?

Fai tan só uns días todos os medios de comunicación recollían a aposta de Zara pola moda sostible, tras o lanzamento dunha nova colección respectuosa co medio ambiente. Conscientes das preocupacións medioambientais dos consumidores, cada vez son máis os operadores de moda que se suman a esta tendencia que aplica criterios sostibles a toda a cadea de produción téxtil. Hoxe no blog de As Cancelas analizamos a nova colección eco-friendly de Zara e as iniciativas de moda sostible doutras marcas low cost. Be green my friend!

Dentro da estratexia de sostibilidade do buque insignia do grupo Inditex nace Join Life, unha colección de moda feminina con siluetas limpas e unha paleta de cores inspirada en tons minerais, realizada con materiais como o algodón orgánico, la reciclada e Tencel, unha fibra de madeira procedente de bosques xestionados de forma sostible que garante a súa reforestación e que reduce o impacto medioambiental.

A colección, que se define como unha fusión entre estilo masculino e feminino, garante uns procedementos medioambientais e sociais excepcionais na elaboración dos artigos coa denominación Zara Join Life, así como o uso das mellores técnicas dispoñibles e as materias primas máis sostibles.

Dentro da etiqueta Join Life, Zara tamén está a desenvolver un programa de recolleita de roupa nunha selección da súa rede de tendas, entre a que se atopa Zara As Cancelas. A roupa que xa non utilizas pode ter unha segunda vida se a depositas nos contedores que teñen habilitados nas tendas para a súa recolleita, desde os que se doa directamente a organizacións como Cáritas, Cruz Vermella e Oxfam, onde separan e clasifican cada unha das pezas para darlle o destino máis adecuado.

Pero a multinacional galega non é a única marca concienciada coa sostibilidade, se non que cada vez son máis as empresas que toman conciencia sobre a produción innecesaria de residuos e a creación de produtos máis ecolóxicos e agradables para o medio ambiente, como H&M. O xigante sueco da moda uniuse á corrente sostible en 2011 co lanzamento de Conscious Collection, unha liña formada por pezas realizadas con materiais respectuosos co medio ambiente, libres de produtos químicos e confeccionadas de xeito ético.

O algodón e o liño orgánicos, cultivados sen o uso de sustancias químicas nocivas; o poliéster reciclado, elaborado a partir de botellas pet ou desfeitos de tecidos; ou o Tencel, un tecido sedoso e renovable realizado cun impacto medioambiental mínimo, son só algúns dos materiais utilizados para a fabricación desta colección. Para o resto de liñas, H&M utiliza un 14% de algodón orgánico, converténdose así segundo a ONG Textile Exchange nun dos maiores consumidores de algodón orgánico a nivel mundial.

Ademais de ser unha das marcas pioneiras do mundo en moda sostible, H&M foi a primeira empresa de moda en introducir unha iniciativa mundial de recolleita de roupa para a súa recíclaxe en 2013, que a día de hoxe recolleu máis de 32.000 toneladas de roupa usada para darlle unha nova vida, vendendo de segunda man a de mellores condicións, convertendo noutros produtos a que non serve para reutilizar, e reciclando os tecidos que están en peor estado. O seguinte vídeo explica dunha forma moi sinxela o camiño que seguen as pezas depositadas nos contedores das súas tendas.

https://www.youtube.com/watch?v=41htZRvz9Gg

Doutra banda está C&A, outro dos xigantes do téxtil que leva anos esforzándose por ser unha marca máis sostible, e é que é unha das poucas da industria que creou unha liña completa de algodón orgánico, ‘Bio Cotton’, que xera ata un 80 % menos de contaminación da auga en comparación co algodón corrente. Composta por todo tipo de pezas, desde pantalóns, camisetas, xerseis ou saias, ata cazadoras e roupa interior, está dispoñible para home, muller e neno.

Separadamente das vantaxes medioambientais que reporta a fabricación de coleccións con algodón orgánico, as pezas realizadas con este material tamén aportan beneficios ao propio consumidor, xa que o algodón orgánico coida máis a pel que outros materiais máis sintéticos, algo que preocupa moito aos pais dos pequenos da casa, cuxa pel é moi sensible nos seus primeiros anos de vida.

A tendencia de integrar as preocupacións medioambientais dos consumidores nos procesos de produción cobra maior importancia para os principais actores da industria da moda, pero ti tamén es moi importante para contribuír a pechar o ciclo de vida das túas pezas de roupa, apúntaste á moda sostible?