Un aniversario moi galego
O próximo 15 de novembro cúmprense catro anos dende o día que As Cancelas abriu as súas portas ao público para ofrecer aos cidadáns de Santiago de Compostela e a súa área metropolitana a mellor oferta comercial, os mellores locais de ocio e o mellor servizo posible. Que rápido pasa o tempo, verdade?
https://www.youtube.com/watch?v=n3i4jxxN2JM
Catro anos nos que o noso único obxectivo foi e é que vos sintades en As Cancelas como na vosa propia casa. Catro anos nos que medramos e evolucionamos ata o que hoxe somos. Catro anos nos que vos acompañamos e nos que vivimos irrepetibles momentos xunto a vós, por iso queremos que compartades con nós esta data tan especial. Hoxe no blog de As Cancelas revelámosvos todo o que temos preparado para o cuarto aniversario do centro comercial.
O venres 11, ás 17:00h, damos o pistoletazo de saída ás actividades do aniversario máis galego de As Cancelas coa apertura da nosa pista de xeo, localizada na primeira planta, da que poderán gozar de xeito gratuíto todos os cativos de 3 a 12 anos. Permanecerá aberta ata o día 26 de novembro e para acceder a ela tan só haberá que mostrar o carné de socio do Club de Celi. Aqueles que aínda non sexan socios do noso club infantil poderán facer a súa inscrición no mesmo momento para poder gozar dunha xornada de diversión sobre xeo na que Celi tamén calzará os patíns para acompañar a todos os seus pequenos amigos. De luns a venres abrirá de 17:00h a 21:00h, e os sábados de 12:00h a 14:30h e de 16:30 a 21:00h.
Tamén o día 11, ás 20:30 horas, o grupo de folk santiagués Os D’Abaixo deleitaranos cun concerto no que interpretarán versións de cancións populares galegas e composicións propias. A formación, que porá a nota musical ás actividades programadas para festexar o aniversario, foi creada en 2010 por músicos de longa experiencia noutras bandas como Berrogüeto ou Fía na Roca, que se fixeron imprescindibles en circuítos europeos da música de raíz, como o festival de Lorient (Francia) ou o Músicas do Mundo celebrado en Etxarri-Aranaz (Navarra).
O sábado 12, ás 18.30, chegará a As Cancelas o famoso R4 de Os Bolechas con Carlos, Braulio, as xemelgas Pili e Loli, Sonia, o pequeno Tatá e o seu cadelo Chispa. Os personaxes máis queridos dos nenos e nenas de Galicia, que xa nos acompañaron hai catro anos na inauguración do centro comercial, pasarán a tarde en As Cancelas para que todos os seus fans se poidan facer unha foto con eles e levala de balde como recordo. Ademais contaremos coa compaña do grupo de teatro infantil Falabaratas para pasar unha tarde súper divertida.
Abriremos o segundo fin de semana do aniversario de As Cancelas en clave de humor da man de Xosé Antonio Touriñán. O famoso cómico galego, coñecido por formar parte do dúo Mucha e Nucha e por participar no programa de televisión Land Rober, divertirá a todo o mundo cun monólogo exclusivo o venres 18 ás 20:30h.
Como colofón final, o sábado 19 de novembro, ás 19:30 h, o gran Roberto Vilar exercerá de mestre de cerimonias dunha edición moi especial do mítico programa de televisión O Prezo Xusto, na que se repartirán 3.000 euros en premios entre todos os que concursen. Os boletos para estar entre os 16 elixidos e participar no concurso poderanse retirar o mesmo sábado na planta 2 do centro comercial, xunto ao escenario do concurso. En total repartiranse 200 boletos que se irán entregando por orde de chegada ao evento, dos que se sacarán 16 números por sorteo, e que se corresponderán cos participantes. A maiores, seleccionaranse outros 2 concursantes a través de redes sociais nos días previos ao concurso, que xunto aos outros 16, sumarán un total de 18 participantes. Consulta as bases completas do concurso aquí.
Se ti tamén queres participar e poder optar a gañar o grande escaparate final, agardámoste o sábado 19 na nosa edición especial de ‘O prezo xusto’. A xogaaaaar!