Vive as Olimpíadas Galegas en As Cancelas
Aínda que aos rapaces de agora lles pareza imposible, houbo un tempo non moi afastado en que o entretemento non estaba ligado á pantalla do móbil ou da tablet. Os nosos pais e avós pasaban intres estupendos xogando en grupo ao tirafungueiro, ao varapao, aos birlos ou a moitos outros xogos tradicionais galegos que o Museo Etnolúdico de Galicia (MELGA) recuperou e que As Cancelas trae o vindeiro sábado 11 de xuño para que poidades practicalos en familia.
Os nenos de antes pasaban moito tempo fóra de casa e os xogos desenvolvíanse ao aire libre, en contacto coa natureza ou no barrio. Como os xoguetes eran moi caros, os máis pequenos fabricaban os seus propios instrumentos de xogo con cousas que tiñan ao seu alcance: paus, cordas, trapos, pedras… Así naceu a billarda, que se xoga con dous paus, un longo e outro máis curto, e que consiste en facer saltar dun golpe o pau curto e golpealo no aire para envialo o máis lonxe posible. Ou as carreiras de mazarocas, nas que se fai como unha serie de relevos cunha mazaroca de millo.
Moitos destes xogos séguense a practicar a día de hoxe, como é o caso da chave, que conta con distintas modalidades de xogo ao longo de Galicia, ou a billarda, da que se disputan competicións a nivel galego. Outros son moi antigos, como a ra, que se remonta ao antigo Exipto, e outros son a versión local de xogos universais: carreiras de chapas, xogos de tiro con gomas ou o turro da maroma.
Pero todos teñen algo en común: xóganse en grupo, son para todas as idades e son moi divertidos. Nas Olimpíadas Galegas que celebramos o día 11 de xuño en As Cancelas, poderedes gozar dunha selección de xogos tradicionais galegos e dunha exposición de xoguetes antigos, como as carrilanas, o máis parecido a un skateboard para os rapaces do século pasado.
Ademais, tamén haberá sitio para outros xogos do mundo como o asieté bretón, o palet dos Países Baixos ou o billar xaponés, unha pequena mostra do material que o MELGA exhibe na súa sede de Ponteceso.
E se participas en dez dos xogos dispoñibles terás agasallo seguro. Non perdas a gran festa das Olimpíadas Galegas en As Cancelas!
Consulta o mapa e o programa de actividades aquí.