And the Oscar goes to…
Como cada ano por estas datas, o Dolby Theatre de Hollywood acollerá o vindeiro domingo 26 de febreiro a cerimonia de entrega dos premios máis importantes do cinema a nivel internacional, a famosa gala dos Oscar. Hoxe no blog de As Cancelas contámosche todo o que debes saber sobre a edición deste ano e algunhas curiosidades históricas que quizais non coñecías.
A primeira edición dos premios remóntase a maio de 1929 e celebrouse no Hotel Roosvelt de Hollywood, onde se repartiron 15 figuras ás mellores películas de 1927 e 1928 da man do presidente da Academia naquel momento, Douglas Fairbanks. Naquela época, o despregamento do acto pouco tiña que ver co da actualidade, xa que a gala non se retransmitía a través de ningún medio e só duraba 15 minutos.
Foi en 1953 cando se produciu a primeira transmisión televisada dos premios en branco e negro a través da cadea NBC, todo un fito que a día de hoxe mantén a máis duns mil millóns de espectadores de todos os países pegados á pantalla durante cada gala, segundo datos da Academia.
Quen non se preguntou algunha vez de onde vén o nome do galardón? Aínda que non hai unha historia oficial, a teoría que ten máis peso é a de que a secretaria executiva da Academia das Artes e as Ciencias Cinematográficas, Margaret Herrick, ao ver o premio dixo que se parecía ao seu tío Oscar.
A famosa figura, deseñada por Cedric Gibbons e esculpida por George Stanley, sitúa a un home espido sobre unha bobina de película, que representa aos gremios que compoñen a Academia: actores, directores, escritores, técnicos e produtores. Mide 34 centímetros, pesa 3,85 quilogramos e o seu valor é de 1$, xa que a academia obriga aos gañadores a asinar un contrato polo cal no caso de que poñan á venda a figura, a academia ten un dereito preferente de adquisición pagando só 1$ en compensación.
A categoría da película con máis Óscar da historia compártena tres títulos con 11 galardóns cada un: Ben-Hur” (1959), Titanic (1997) e “O Señor dos Aneis: o Retorno do Rei” (2003). A título persoal, Walt Disney é a persoa que ata o momento recibiu máis premios da historia, con 22 Oscar dun total de 59 nomeamentos.
Para esta edición, e tras arrasar nos Globos de Ouro, parece que o musical La La Land é a película favorita de todas as quinielas, pero teremos que agardar ata o día 26 para sabelo. Mentres tanto, deixámosvos os títulos dos nomeamentos a mellor película.
La La Land (Damien Chazelle): conta a historia de Mia e Sebastian. Ela é unha das moitas aspirantes a actriz que buscan lograr o seu soño hollywoodiense, pero gáñase a vida como camareira mentres se presenta a moreas de castings. El é un pianista que soña con rexentar o seu propio club de jazz. Os seus destinos cruzaranse e a parella descubrirá o amor, un vínculo que fará florecer e logo poñer en xaque as aspiracións de ambos.
Moonlight (Barry Jenkins): narra a complicada infancia dun mozo afroamericano nun dos barrios máis conflitivos e marxinados de Miami. A medida que pasan os anos, o mozo descóbrese a si mesmo e atopa o amor en lugares inesperados.
Manchester frente ao mar (Kenneth Lonergan): Lee Chandler é un solitario conserxe. A súa vida cambia por completo cando, tras a morte do seu irmán maior, é designado como único titor legal do seu sobriño de 16 anos. Lee verase obrigado a enfrontarse a un pasado tráxico que lle levou a separarse da súa esposa Randi e a comunidade na que creceu.
Comanchería (David Mackenzie): tras a morte da súa nai, un pai divorciado e o seu irmán, un ex presidiario, deciden realizar unha serie de roubos en diferentes sucursais, co fin de poder conseguir o diñeiro suficiente como para poder salvar a granxa familiar.
A chegada (Denis Villeneuve): trátase dun thriller de ciencia ficción no que naves espaciais chegan á terra. O Goberno dos EEUU pide axuda á lingüista Louise Banks para tratar de descifrar o motivo da súa visita. A medida que a humanidade se cambalea ao bordo dunha guerra, Louise e o seu equipo loitan contra o tempo chegando a poñer en risco a súa vida e a do resto da humanidade.
Ata o último home (Mel Gibson): conta a historia do soldado Desmond Doss, un mozo médico militar que participou na batalla de Okinawa, no Pacífico durante a II Guerra Mundial, e converteuse no primeiro obxetor de conciencia na historia estadounidense en recibir a Medalla de Honra do Congreso.
Lion (Garth Davis): un neno indio de 5 anos pérdese nas rúas de Calcuta, a miles de quilómetros de casa. Consegue sobrevivir a moitos desafíos antes de ser adoptado por unha parella australiana. 25 anos máis tarde prepárase para atopar á súa familia perdida.
Fences (Denzel Washington): é a historia dun traballador do sistema de rede de sumidoiros de Pittsburgh, que unha vez soñou cunha carreira profesional de béisbol, pero xa era demasiado maior cando a primeira división do béisbol empezou a admitir xogadores negros. Esfórzase por ser bo pai e marido, pero ver o seu soño truncado lle corroe e lévalle a adoptar unha decisión que ameaza con esnaquizar a toda a súa familia.
Figuras ocultas (Theodore Melfi): narra a visión da carreira espacial americana a través dos ollos de tres brillantes mulleres científicas afroamericanas que traballaron na NASA a comezos dos anos sesenta (en metade da loita polos dereitos civís dos negros estadounidenses) no ambicioso proxecto de poñer en órbita e garantir o seu regreso ao astronauta John Glenn.
Se queres gañar estupendos premios, só falta que nos digas na nosa páxina de Facebook cal é a túa favorita para alzarse co premio a mellor película. Para participar na nosa porra dos Oscar, tan só tes que deixarnos un comentario na publicación da ligazón contándonos a túa aposta. Entre todos os que acerten o Óscar á mellor película, sortearemos unha entrada de cinema dobre, acompañada de flocos de millo e bebida para dúas persoas. Moita sorte!